Қазақ әдебиетінің классик жазушысы, көрнекті қоғам қайраткері, көркем сөздің хас шебері Ғабиден Мұстафин биыл 115 жасқа толады. Ғ.Мұстафиннің асыл мұрасын балаларға таныту — біздің міндетіміз. Осыған орай, орталық қалалық кітапханада «Дәуір шындығымен үн қатқан озат» атты портрет кеші өткізілді. Шараға қатысқан №4 «Болашақ» мектеп-интернатының оқушылары жазушы Ғабиден Мұстафиннің өмірі және шығармаларымен танысты. «Мен әрдайым бүгінгіні, шамам келгенше – ертеңгіні жаздым. Жазушы, алдымен, өз дәуірінің жаршысы. Мен өз бойымдағы бүкіл дарыным мен күш - қуатымды… халық мүддесіне қалтқысыз, алаңсыз бағыштаған жазушымын. Менің творчествомның өзегі, арқауы, негізі жаңа заман, жаңа адам» - деп, Ғ.Мұстафин айтқандай, оқушылар «Қарағанды», «Миллионер», «Шығанақ» романдарының кейіпкерлеріне талдау жасап, жаңа заманның адамдарымен салыстырып, өз ойларын ортаға салды.

Ғабиден Мұстафин мұрасы - 20 - 40 жылдардағы Қазақстанның көркемдік шежіресі. Жазушы шығармаларынан ескен шындық - дән салмағынан басын көтере алмай, маужырай тербелген қалың бидай мен гүрсілдеген шыңырау шахтаны аралатып, туған өлкеге көз жібертеді – еңбекке толы уақытты, қарапайым еңбек адамын көресіз. Ғабиден Мұстафин жағымды кейіпкерлердің тұтас бір тізбегін жасады. Олар жарқын болашақ үшін батыл күресіп, ел - жұртының арман - тілегі, мүдде - мақсатының орындалуына аянбай ат салысты – азаматтық тұғырдан түспеді. Өз заманымен тығыз байланысып, күш - қуатын уақыт алдындағы борышты өтеуге арнау, өз замандасына аянбай қызмет ету, еңбек адамының ой - арманын, баянды ісін мадақтай жырлау, белсенді күрескер биігінен таймау Ғабиден Мұстафиннің рухани келбеті.